سیدحبیب‌الله آغا، وزیر معارف گروه طالبان می‌گوید ما خود را جانشین صحابه‌ی کرام(یاران پیامبر اسلام) می‌دانیم ولی شبیه آن‌ها حکومت نمی‌کنیم.
او این اظهارات را امروز(چهارشنبه، ۲۶ ثور) در کنفرانس ساده‌سازی پروسه‌های دولتی در مرکز رسانه‌ها در کابل بیان کرده است.
در ویدیویی که از سخنرانی وزیر معارف گروه طالبان منتشر شده، او از عملکرد خودش و دیگر رهبران این گروه انتقاد می‌کند و می‌گوید: «ما خود را جانشین صحابه‌ی کرام می‌دانیم ولی خلاف صحابه، ما به خاطر پروسه‌های پیچیده‌ی نهادهای حکومتی برای مردم در دسترس نیستیم.»
او می‌گوید: «ما به خاطر همکاری مردم به این‌جا رسیدیم و امارت ساختیم اما فعلا مردم نمی‌توانند یک وزیر را ببینند.»
به گفته‌ی او، اگر کسی بخواهد فرصت ملاقات با وزیر طالبان را بگیرد، کارش از امروز به فردا و پس‌فردا می‌ماند.
وزیر معارف گروه طالبان می‌گوید «آیا صحابه‌ی کرام همین‌گونه حکومت می‌کرد که ما حکومت می‌کنیم؟ بیایید تمام پروسه‌های دولتی و حتا نشست و برخاست خود را ساده‌سازی کنیم.»
