مولوی عبدالقدیر حامی، از حامیان طالبان و مبلغ اندیشه‌ی این گروه در شهر تالقان، مرکز تخار علیه دولت تاجیکستان اعلام جهاد کرده است.
ویدیویی از سخنرانی این ملای حامی طالبان به تازگی در شبکه‌های اجتماعی همگانی شده است.
او در این سخنرانی تاکید می‌کند که به خاطر سیاست تاجیکستان در مورد پوشش زنان «جهاد» علیه دولت این کشور بر «همه‌ی جوانان مسلمان جهان فرض» است.
پارلمان تاجیکستان ماه گذشته خورشیدی قانونی را تصویب کرد که بر مبنای آن، پوشش برقع و حجاب نقاب‌دار رایج در کشورهای عربی و افغانستان، به خاطر مسایل امنیتی و فرهنگی ممنوع شد.
در ظاهر امر، به همین دلیل این مولوی پرطرفدار حامی طالبان از یک ولایت هم‌مرز جنوبی تاجیکستان اعلام جهاد کرد و با «تکبیر» حاضرین مجلس مواجه شد.
او تاکید کرد که اگر تاجیکستان از این تصمیم خود دست نکشد، جهاد علیه دولت امام علی رحمان، نه تنها بر شهروندان تاجیکستان که بر جوانان پشتون، تاجیک، ترک و همه جوانان مسلمان جهان فرض است.
این در حالی است که کشورهای آسیای میانه با وجود نگرانی از گسترش تروریسم و اسلام سیاسی از طریق افغانستان بازهم پس از روی کار آمدن طالبان با این گروه روابط سیاسی-اقتصادی برقرار کرده‌اند.
اما تاجیکستان هنوز نسبت به دیگر کشورهای آسیای میانه با طالبان روابط سردتری دارد، ضمن اینکه از رهبران جبهه مقاومت ملی، نیروی سیاسی-نظامی مخالف طالبان نیز میزبانی می‌کند.
