ظاهر اغبر، سفیر افغانستان در دوشنبه می‌گوید دولت تاجیکستان ۵۰ سیت بورسیه تحصیلی برای دانشجویان افغانستان اهدا می‌کند.
آقای اغبر امروز(شنبه، ۲۶ جوزا) در فیسبوک نوشته است که متقاضیان این بورسیه‌ها، مدارک مورد نیاز را تا تاریخ چهارم ماه اسد سال جاری خورشیدی به «اتشه معارف سفارت افغانستان در تاجیکستان» تحویل دهند.
او افزوده است که برای شناسایی افراد شایسته‌ی این بورسیه‌ها، سفارت افغانستان در دوشنبه از متقاضیان امتحان می‌گیرد و برای دانشجویان دختر امتیاز بیشتری در نظر گرفته خواهد شد.
اما سفیر افغانستان مشخص نکرده است که این بورسیه‌های تحصیلی برای کدام مقاطع تحصیلی و در کدام دانشگاه‌های تاجیکستان است.
او این فرصت تحصیلی را «امیدی برای تقدیم نسل جدیدی از متخصصین برای خدمت به اجتماع» دانسته است.
ظاهر اغبر که در دوره‌ی جمهوریت به عنوان سفیر افغانستان کارش را در شهر دوشنبه، پایتخت تاجیکستان آغاز کرد، تا هنوز از این نمایندگی دیپلماتیک کشور در برابر طالبان حفاظت کرده و به این گروه تسلیم نداده است.
