وزارت سرحدات، اقوام و قبایل طالبان با نشر اعلامیه‌ای سفر نخستین هیات رسمی تاجیکستان به کابل را تایید کرد و گفت دو طرف روی مسایل امنیتی و مرزی گفت‌وگو کرده‌اند.
نورالله نوری، وزیر سرحدات طالبان گفته است که «امنیت، گسترش روابط، مشکلات سرحدی و تثبیت سرحد مشترک» از مسایل مورد بحث با هیات تاجیکستانی بود.
خبرگزاری باختر صبح شنبه، ۲۴ عقرب گزارش داد که هیاتی از سوی دولت تاجیکستان وارد کابل شده است.
پس از روی کار آمدن مجدد گروه طالبان، این نخستین سفر یک هیات رسمی از سوی دولت تاجیکستان به افغانستان است.
طبق اعلامیه طالبان، وزیر سرحدات این گروه بر «تثبیت سرحد مشترک میان افغانستان و تاجیکستان» تاکید کرده و گفته است که این مساله نقش مؤثری را در ثبات و امنیت هر دو کشور ایفا می‌کند.
در اعلامیه به نقل از میرزازاده عبدالواحد، نماینده هیات تاجیکستان آمده که او نیز ابراز امیدواری کرده است تا مشکلات مرزی میان دو کشور از طریق تفاهم حل شود.
طی چهار سال گذشته جنگجویان گروه طالبان بارها با مرزبانان تاجیکستان درگیر شده‌اند.
سفر هیات تاجیکستانی به کابل نخستین اقدام رسمی و آشکار این دولت با گروه طالبان است که ممکن است منجر به تعامل بیشتر شود.
تاجیکستان تا هنوز در بین کشورهای منطقه کمترین روابط را با گروه طالبان دارد و سفارت افغانستان را هنوز به این گروه نسپرده بلکه توسط سفیر گماشته‌ی نظام جمهوری اداره می‌شود.
