وزارت داخله تاجیکستان اعلام کرد که یک جوان اهل افغانستان که به شکل غیرقانونی در این کشور زندگی می‌کند، به اتهام قتل یک زن بازداشت شده است.

این وزارت می‌گوید محمدعمر رحمانی، ۲۲ ساله اهل افغانستان، یک زن ۲۷ ساله تاجیکستانی به نام عزیزه وحیدوف را در روستای دهنموی ولسوالی جبار رسولوف ولایت خجند به قتل رسانده است.

پس از وقوع این رویداد، حکومت محلی اقدامات سختگیرانه‌ای علیه مهاجران افغانستانی مقیم خجند روی دست گرفته است.

منابع از میان مهاجران امروز(دوشنبه، ۱۴ ثور) با نشر تصاویری در شبکه‌های اجتماعی می‌گویند حکومت محلی خجند ده‌ها مهاجر افغانستان را بازداشت و به یک کمپ ویژه مهاجران در دوشنبه منتقل کرده است.

به گفته منابع، حدود ۲۵۰ خانواده افغانستانی مقیم خجند که اکثریت آنان پس از روی کار آمدن مجدد طالبان در قدرت از ترس انتقام‌جویی این گروه به پاکستان پناه برده، در معرض اخراج اجباری قرار گرفته‌اند.

تا هنوز سفارت افغانستان در دوشنبه و دولت تاجیکستان در مورد احتمال آغاز روند اخراج اجباری مهاجران چیزی نگفته‌اند.