پس از قتل یک زن تاجیکستانی توسط یک مرد افغانستانی، حدود ۲۵۰ مهاجر به صورت اجباری به افغانستان اخراج شدند.

رسانه‌‎های تاجیکستانی گزارش داده‌اند که این مهاجران روز دوشنبه، ۱۴ ثور از منطقه مهربود ولسوالی جبار رسول‌اف ولایت سغد این کشور به صورت دسته‌جمعی بازداشت شدند.

نشریه آسیاپلس در گزارشی نوشته است که نهادهای دولتی تاجیکستان در مورد بازداشت و اخراج دسته‌جمعی مهاجران افغانستانی چیزی نمی‌گویند.

اما همسایگان این مهاجران شهادت داده‌اند که ۱۳ موتر کل مهاجران را یکجا بردند و دیگر هیچ کسی بازنگشته است.

در همین حال، شماری از این مهاجران روز سه‌شنبه، ۱۵ ثور به رسانه‌ها گفته‌ که آنان از تاجیکستان اخراج و وارد ولایت قندوز شده‌اند.

منابع از بین این مهاجران گفته‌اند که پولیس تاجیکستان حتا به آنان اجازه نداد وسایل شخصی و قابل انتقال خود را بردارند.

به نظر می‌رسد اخراج این مهاجران با قتل یک زن تاجیک مرتبط باشد.

وزارت داخله تاجیکستان می‌گوید محمدعمر رحمانی، ۲۲ ساله اهل افغانستان، یک زن ۲۷ ساله تاجیکستانی به نام عزیزه وحیدوف را در روستای دهنموی ولسوالی جبار رسول‌اف ولایت سغد به قتل رسانده است.

متهم بازداشت شده و اکنون در توقیف پولیس تاجیکستان است.